Mbuluar me flamurin kombëtarë dhe me të gjitha nderimet. Kështu ka mbërritur ditën e sotme trupi i pajetë i Zarife Hasanajt. Nën tetarja humbi jetën ditën e hënë në Letoni, në krye të detyrës. Veçmas familjarëve dhe miqve, e pranishme në pritjen e trupit ka qenë edhe ministrja e Mbrojtjes, Olta Xhaçka. Ashtu si shihet edhe në këto foto, ministrja nuk i ka mbajtur dot lotët, kur i ka kaluar pranë trupi i 32-vjeçares. Më herët ajo ka zhvilluar një vizitë në familjen e nën tetares Zarife Hasanaj pas kthimit nga Letonia.
Ministrja ka ngushëlluar familjarët e efektives së FA, duke e cilësuar humbjen e vajzës së tyre një humbje të gjithëve.Ajo iu dha dhe lajmin familjarëve se Hasanaj shpallet “Dëshmore e atdheut”. “Dhimbja juaj është edhe e jona. Jeni pjesë e familjes së madhe ushtarake. Do keni mbështetjen tonë për çdo nevojë. Ndarja nga jeta e Zarifes është një humbje e madhe për të gjithë ne”, deklaroi Xhaçka. Ashtu si shihet edhe në pamjet, krahas kolegëve në Rinas janë edhe familjarët e 32-vjeçares që po e presin me lot në sy.
